從失敗投資心態解放出來

從失敗投資心態解放出來

1983年9月港元滙價曾跌至九點七兌一美元，全港超級市場貨品被搶購一空，市民因擔心加價紛紛搶購日用品造成恐慌。2003年沙士事件全港出現口罩短缺，麻煩中央政府送口罩畀港人！
　　最令人恐慌嘅其實就係「恐懼」本身。美國商業機構大增石油存量，後果會否一樣？
　　投資格言話，永遠不要拋售一隻從低價回升15％或以上嘅股份！寧買當頭起，莫買當頭跌，任何股份如回落15％便沽之哉（但唔好因回落5-10％而沽出，可能只係獲利回吐）；反之，如升15％卻唔係獲利回吐時刻。
　　五十天移動平均線跌穿二百五十天線係極壞訊號，呢類股份少沾手；反之，五十天移動平均線重返二百五十天線之上唔代表乜，並非極好訊號。
　　入貨需要耐性，價位合適亦只先行購入投資金額三分一然後再觀察；出貨一樣唔使急。股票市場最缺乏嘅係耐性，投資者態度應該係寧可錯過，不可買錯或賣錯。
　　成功投資者及失敗投機者最大分別可能係，喺整個投資過程中，成功投資者持有兩至三隻優質股唔放，而投機者喺獲取15％利潤後沽出優質股，又去炒另外一隻。
　　另一投資格言係，沽出邊際純利不足5％嘅股份（除非未來邊際純利在上升中），邊際純利不足5％代表該行業已進入激烈競爭期。唔好買入邊際毛利開始萎縮嘅股份，尤其邊際毛利已低於兩位數字者。

從失敗投資心態解放出來

　　唔好買入後持有不放，亦唔好經常買賣。如每年買賣股份超過七次，可能已次數太多。你最佳朋友係趨勢，唔係你嘅經紀。
　　一個人投資係受某些理由驅動，例如追求物質享受。有人認為愈有錢愈快樂、更被人重視或更安全，事實證明擁有金錢只提供短暫快樂，例如一間大屋、一架靚車、名貴珠寶……很快便會感到沉悶，繼續去追求更大嘅屋、更靚嘅車、更名貴嘅珠寶，最後迷失自己。人生中最有價值嘅東西往往係金錢買唔到，例如子女對你嘅尊重、家人對你嘅愛、自由自在嘅感覺，呢D都係金錢買唔到嘅。
　　有D人因恐懼而投資，唔少嚟自要求嚴格嘅家庭，父母希望子女有出色表現。佢地投資目的係基於恐懼，經常患得患失，因此往往錯過良好入市機會而事後後悔，佢地希望有安全感而唔肯冒險，避免承擔風險而一再錯失機會，最後感到十分沮喪及面對危機唔肯下決定。呢D人如不解放自己，喺投資上好難有出色表現。
　　有些人因怨恨而投資，例如年輕時被有錢女朋友拋棄或因貧窮而被人睇唔起。由於充滿憤怒，許多時犯過分冒進嘅毛病，所以應學習寬恕及原諒，讓過去成為過去。今天你富有又點樣？年輕時嘅有錢女朋友亦唔會返到你身邊。至於睇唔起你嘅人早已忘記當年嘅事，只係你自己無法忘記，耿耿於懷。
　　上述投資態度皆不正確，往往帶嚟失敗後果，你應從上述枷鎖中解放出來，簡化你嘅生活，學習平常心對待事物。只有心靜如水嘅投資者，才能獲取更大成就。性格並非天生，而係發展出嚟，改變性格才能改變生命，只有無所畏無所懼無所求嘅投資者，才能進入成功之殿，享受投資帶嚟嘅樂趣而非壓力。