決定你係窮人抑或富人的十大標準

決定你係窮人抑或富人的十大標準

又係曹生的文章，不過今次係二月十九日既投資者日記，今日先得閒"記"番。
決定你係窮人抑或富人有十大標準。
自我認知。窮人好少諗如何去賺錢及點樣才能賺到錢，好聽D係「安貧樂道」，唔好聽係「不思進取」。反之，富人天生強烈賺錢欲，會想盡一切辦法去致富。

休閒。窮人認為「食少多覺訓」，寧願花時間睇《大長今》，仲要加入《大長今》熱去吃韓菜。富人冇興趣睇肥皂劇，只會動腦筋《大長今》熱中賺一筆。

交際。窮人喜歡同窮人做朋友，心理上排斥有錢朋友，唔係有錢朋友睇唔起佢，而係自卑心作怪，結果只研究邊度有廉價套餐、邊間百貨公司大減價.......。反之，富人交際往往研究股市點睇、滙市點睇、樓市點睇、邊處有錢搵。結果窮人只知邊度有廉價套餐邊處大減價，富人卻知邊度有錢搵。

學習。窮人學手藝，以便一技旁身天下通行；富人學投資，懂得錢搵錢。

時間。窮人嘅時間唔值錢，可以跑遍港九新界去買廉價貨慳番幾十蚊，會浪費咗一整天時間。富人嘅閑，閑在身體，例如打高爾夫球其實係傾緊生意，腦袋冇一刻停過；窮人嘅閑，閑在思想，忙着去麻將桌上摸幾把或研究馬經。

金錢態度。窮人經濟觀節省，勸與儉，慳得一萬就係一萬，甚至投資亦離唔開「雞生蛋」理論。例如我老曹2002年叫人買金，唔少人回答冇息收，佢地估唔到金價三年升值50%﹝由二百八十美元升至四百二十美元﹞，而斤斤計較雞會否生蛋。幾多股份雖然冇息派，但一年股價上升100%，窮人一聽到冇息派已冇晒興趣。

激情與感情。窮人只有感情，聽完新馬師曾唱《萬惡淫為首》便流淚兼捐錢，感情太豐富兼有代入感，好易受感動。反之富人卻不易受感動，例如1989年六四事件居然認為滿街鮮血係入市時機。

自信與自卑。窮人自卑，有D錢便穿名牌戴名錶揸名車才能增加自信，十分介意人地點睇自己。富人自信而不自卑。李實發係典型例子，藍色西裝十年如一日，戴精工表，飲自己公司屈臣氏售賣嘅價紅酒.......。呢份自信令佢地喺光景不佳時唔悲觀，喺繁榮期亦只謹慎槳觀；反之，窮人喺繁榮期亂花錢，喺衰退期呼天搶地。

習慣。有個富人見自己親戚太窮，送咗一隻牛畀佢。窮人滿心歡喜，但諗到牛要食草，結果將牛賣掉，買D雞嚟養希望生蛋，結困幾天劏一隻雞嚟食，一年後富人去探望佢，佢依然故我仍然係窮人一名；窮人嘅習慣今朝有酒今朝醉。原來富人自己年輕時亦冇錢，辛辛苦苦儲錢買隻牛，然後到處帶隻牛去食草揸奶賣，賺到錢便買羊生羊仔賣錢，然後開農場，最後變得富有。富人以為送隻牛畀親戚可令其發達，但唔明白窮親戚未養成儲蓄與投資習慣，每年送佢一隻牛亦無法脫貧。

上網。窮人上網搵娛樂，富人上網搵投資機會。結果窮人愈上網愈窮，富人愈上網愈富。

為何富不過三代？因富人只把財富留畀親人，而非改變佢地對錢嘅觀念。一如上述富人向窮親戚贈牛，而非敎佢養牛。
給窮人一條魚今餐佢有餸食，敎曉佢捉魚佢便有謀生技能，培養佢管理漁場技巧佢便可以發達。貧與富最大分別在此！